BOHLATSE BYA GORE O PHOLOŠITŠWE

TLALA LE LENYORA

“Ba lehlogonolo ke ba tlala ya gore ba loke, ba ba nyoretšwego gona, gobane bonabao ba tlo horišwa” Northern Sotho. “Blessed are those who hunger and thirst for righteousness, for they shall be filled” NKJ (Matthew 5:6)

Le, ke lengwalo le Morena a nkutulletšego lona moyeng ge ke seno phološwa. Ke sa gopola gabotse, o ka re ke taba ye e diregilego maabane. Seka se Morena a se hlagišitšego mo go nna ka morago ga phološo e bile lenyora la go nyorelwa Lentšu. Ke ile ka nyorwa ka tsela yeo e sego ya ka ya direga mo bophelong byaka ka moka. Ke be ke ekwa gore go na le selo se ke sa se tsebego se ke swanetšego go se tseba. Se se bego se makatša ka lenyora le, ke gore ke be ke kwišiša gore ke Beibele fela ye e ka le timolago. 

Ga ke a ka ka senya nako; Mokibelo wa mathomo ka morago ga phološo, ka ya Kempton Park ka yo reka Beibele (New Testament) ya Northern Sotho. Ka e bala ke e thalela; ke a go botša ya šala e le methalothalo gohle. Mogwera, mantšu ga a kgone go hlalosa se ke bego ke se kwa. Ke be ke bala Beibele ‘nako tšohle: mo ke bego ke dula, le mošomong. Nako enngwe, le nako ya dijo e be e mpheta ke sa bala. Ke be ke maketše gore go direga eng ka nna. Ka humana, la mathomothomo mo bophelong byaka Beibele e bolela le nna thwii!

Tiragalo yeo ya nthuta gore; bohlatse bya mathomo bya gore motho o phološitšwe, ke lenyora le tlala ya Lentšu le a le kwago. Ke sa gopola gabotse. Ge ke phološwa ke be ke le sebapadi sa kgole ya maoto kua Alexandra, nna ke dula Tembisa. Ke rile go phološwa, ka re mo pelong yaka; beke yenngwe ke tla ya kerekeng, ye nngwe ke tla ya bolong. Kereke le bolo di tla swanelwa ke go šielana, byalo byalo.  Ba kereke le ba bolo ba tla swanelwa ke go kwišiša. Ngwanešo; seo ga se a ka sa kgonego le gatee. Lenyora le tlala yeo ke bego ke ekwa, e be e sa mphe le nako ya go ya papading Alexandra Stadium moo re bego re bapalela gona. Ya ba gona ge ke tlogetše kgole ya maoto - ka ‘baka la lenyora le tlala ya Lentšu. Ga ke a ka ka laela, ke tlogetše byalo. Le dikhokho (soccer boots) tšaka di sa šetše club house gona moo.

Ke gopola ka morago ga moo. ‘Tšatši le lengwe ke be ke otlela koloi ka van Riebeeck Road, Edenvale (ke tsopola mo le mola) Moya wa Modimo wa re go nna; “nyaka Christian Bookshop o reke cassette ya thero.” Ke be ke sa tsebe ge go na le dicassette tša dithero. Ge ke emiša mahlo; ka bona Christian Bookshop ka ona mmila woo. Ke ile ka tsena, ka botšiša gore naa ba na le dicassette tša dithero naa. Ka yona nako eo mothuši a nkiša ka phapošeng ya ka morago. Ka humana go tletše dicassette ka mehutahuta. Ka humana ke le kgakanegong ka gore ke be ke sa tsebe le o tee wa baruti. Ešita le 5 Mission ke be ke sa e tsebe. Let alone Faith Mission. Ke ile ka nyaka ka dihlogo tša melaetša, ka ya kwa le kwa le yona go fihlela ke humana enngwe ba re ke Good News in these last days, e rerwa ke moruti o mongwe bare ke John Osteen. Ka kgopela gore ba e bapale gannyane. Hei! Ka kwa mohlolo. Ka kwa ka gare gaka gore; yo ke yena moruti wa go dumela se ke se dumelago. Ntle le go senya nako, ka e reka ka kitimela koloing. Ka nako eo dicassette di be di rekišwa R5 fela.

Ntle le go senya nako ka goga koloi ka kitimela ofising Kempton Park. Ke be ke se na cassette player ka koloing, byale ke kitimela ofising gore ke fetše mošomo ka pela ke kitimele gae Tembisa ke yo kwa cassette ye ka botlalo. Go fihleng gaka gae, ga se ka ka senya nako. Ka tšea radio cassette ka tsena koloing ka lahlela cassete yela ka gare. Tša’a boya ke a go botša. Ka e dulela, ya fela, ka e boeletša kgafetšakgafetša.

Ke bolela ka lenyora le tlala ngwanešo. Ke be ke sa kgone go fetša letšatši ntle le gore ke e bapale pele. Ka e dulela ya ba ya gatišega ka gare gaka. Lenyora morwarra. Ka morago ga matšatši ka ya Lighthouse ko Kempton Park go yo botšiša gore naa le bona ba swara di cassete tša dithero naa. Ka humana le bona ba na le tšona. Ka se se senya nako, ka reka tše dingwe. Le tšona tša fetša di gatišegile ka mo gare gaka.

E rile ge ke boelela ba mpontšha dibuka tša John Osteen. Ka reka e tee, ka lala ke e latswitše. Ka le le latelago ka latswa engwe - buka ka letšatši. E rile letšatši le lengwe ge ke boelela go yo reka tše dingwe, ba mpotša gore moruti John Osteen o tlile South Africa. Ga se o mpone ge ke ketimela Rhema moo a bego a rera gona. O ra lenyora? Ke moo ke thomilego go ba le setswalle le mokgalebye yoo wa moše wa mawatle. A nhlahla ka dicassette, dibuka le mangwalo ao a bego a nngwalela ona. Ka hlahlo ya gagwe ka humana Christian City Church ya Moruti Theo Wolmarans. Ke gona mo ke goletšego gona Moreneng ka ba ka tsena Bible College gona.

O ntshwarele ngwanešo ge mohlomongwe ke be ke kwagala eka ke bolela ka nna; aowa ke be ke bolela ka lenyora le tlala ya Lentsu. Jesu o re; “Ba lehlogonolo ke ba tlala ya gore ba loke, ba ba nyoretšwego gona, gobane bonabao ba tlo horišwa.” Ke kgopela gore Morena a tsošološe lenyora la maloba mola o sa tšwa go amogela Morena Jesu. Ga re kgone go sepela le yena ge re sa kwe tlala le lenyora la Lentšu la gagwe.

Mohlomongwe wena o sa tšwa go phološwa. Ga se semaka ge o nyorwa ka mokgwa wo. Lebaka ke gore ga go sa na selo se se ka kgotsofatšago pelo ya gago mo lefaseng. Jesu o re; “Mang le mang yo a nwago meetse a o nyorwa gape, fela yo a nwago meetse a nna ke mo fago ona a ka se tsoge a nyorilwe gape. Meetse a ke tlago mo fa ona e tla ba mothopo mo go yena wa go seloga meetse a go mo fa bophelo bjo bo sa felego” (Johanese 4:13,14) Ke go eletša gore o šale lenyora leo morago, o ye mo le go išago gona. Nna ke ile ka le šala morago gomme le lehono ga ke itshole. Ke ngwala byalo e le ge lenyora la pelo yaka e le gore batho ba phološwe ba ikwele ka bobona se Lentšu la Modimo le direlago ba ba dumelago.