BONANG LERATO LA MODIMO

LERATO LA MODIMO LE A MAKATŠA

Mogwera; naa o be o tseba gore Modimo o a go rata? Modimo o rata batho ka moka. O rata le ba ba sa mo ratego. Modimo o rata batho ka moka. Le ba ba sa išego felo ka yena o no ba rata go le byalo. Gape Modimo ga a rate batho ka gore ba se ne molato. "Modimo yena o bontšhitše lerato le a re ratago ka lona, e le go la mola Kriste a re hwela re sa le badiradibe." (Baroma 5:8)

Modimo o re rata ka tsela ye, ka gore O na le morero ka maphelo a rena. Ge o bala mo Beibeleng o tla bona gore motho ke sebopiwa se le noši se se bopilwego ka seswantšho sa Modimo. Lentšu la Modimo le hlalosa ka mokgwa wo; "Gape Modimo a re: 'Byale a re direng batho ka seswantšho sa rena, ba swane le rena...'" (Genesi 1:26) Taba ye e ra gore batho ka moka ba swana le Modimo. Le nna le wena re swana le Modimo. Ke dumela gore Modimo o bopile mongwe le mongwe wa rena ka gore a na le maikemišetšo a a rileng ka maphelo a rena. 

Ge a se no fetša go dira batho; Modimo a ba hlogonolofatša a re: "Le be le bana ba bantšhi gore ditlogolo tša lena di tle di phele gohle lefaseng mme di le laole. Ke le bea balaodi ba dihlapi le dinonyana le diphedi tšohle tša lefase." (Genesi 1:28) Morero wa Modimo ka batho ke gore ba buše lefase, ba le laole. Motho o bopetšwe go laolwa ke Modimo mola yena a laola lefase le Modimo a le bopilego. Modimo o thaba kudu ge a bona batho ba kgona go buša le go laola. Rena batho re bopetšwe sona seo - go laola. 

Taba ye e tiile kudu, e bile Modimo ga a e lebale. Go ka ba bohlokwa kudu ge le rena re ka se e lebale. Le ge re ka mo furalela, ga a e lebale. Le ge re ka subelela ka gare ga molete wa sebe, ra rutha ka gare ga leraga la boithatelo, Modimo ga a e lebale. Le ge re ka phikologa ka gare ga boithabišo bya lefase, ra bonegelwa ke mabone a mebalabala, ra kgotla re mona; Modimo ga a lebale maikemišetšo a gagwe ka rena. Le ge re šetše re thupilwe, re tsetla ka fase ga morwalo wa bokgoba, Modimo yena ga a fetole morero wa gagwe ka rena. Ke ka lebaka leo o kwelego a botša setšhaba se sengwe sa go kgeloga a re; "Ke nna fela ke tsebago merero ye ke le reretšego yona, merero ya katlego, e sego ya tahlego, merero ya bokamoso bjo bo holofetšago." (Jeremia 29:11)

Le ge re šetše re kgelogile, re nyatša Modimo ka mokgwa wo re phelago ka wona; Modimo o sa no re rata. Ga a re lebale ebile ga a re hloboge. O dula a otlolotše letsogo la gagwe la kgaogelo a re bitša a re 'setšhaba saka boang!

Mogwera; lehono Modimo o bolela le wena o re o na le merero ya katlego ka bophelo bya gago. Maemo a gago a ka no ba a sa dumelelane le taba ye; feela Modimo Yena o sa rialo. O re ke merero ya bokamoso bjo bo holofetšago. 

Se se hlokegago ke gore o dumele ge Modimo a go bušetša mehlaleng ya Gagwe ya go loka. Mo dumelele a beakanye bophelo bya gago gore tše di botse le katlego di go šale morago ka matšatši ohle a go phela ga gago. O kile wa bona motho a kitimišwa ke katlego, mola batho ba kitimiša katlego? Ge o ka kitimiša katlego; o ka se e sware. Feela ge o ka kitimišwa ke katlego, o ka se e šie. Ke sona se Dafida a se bolelago ge a reta Modimo a re; "Tše botse fela le kgaugelo di tlo ntatela mehla yohle ke sa phela" (Pesalome 23:6)

Dumelela Modimo a kgoboketše bophelo bya gago gape. O se ke wa ihloboga; Modimo ga a go hloboge. Mmatamele ka thapelo o re;

Modimo ke tla go wena ka boitsholo

Ke nnete: Le nna ke hloka thušo

Ke a leka: Go a pala

Bophelo byaka bo phatlaletše

Ke leka go bo kgoboketša mme go a pala

Nkgaugele hle Morena

Mpušetše lenaneong la morero wa gago ka bophelo byaka.
Ke kgopela tše ka moka ka Leina la Jesu
Amene!

P.S. Mohlomongwe o hloka thapelo; mohlomongwe o hloka maele. Re romele maina a gago le email goba WhatsApp number re go rapelele Modimo a go thuše. Thapelo le maele ke mahala.