SEBE SE AROGANYA MOTHO LE MODIMO

Etla Modimo a go apeše

Ke sebe fela se se aroganyago motho le Modimo. Motho a ka ba le maikemišetšo a mabotse, feela sebe sa thunthunya merero yeo ka moka. Sebe se tloša motho ka fase ga taolo ya Modimo sa mmea ka fase ga taolo ya Satane. Ge se go kalatša se re o ile go ipuša wa tseba go ikgethele se o se ratago. Se re; o ile go itaola wa imphsina ka monono wa lefase. Sebe se re, o senya nako: Lefase le go emetše. 

O sa gopola koša yela e bego e opelwa mengwaga yela ya bo 1965? E re; 

“Nakong tsa sejwalejwale

Batho ba fetohile

Motho o etsa ntho‘a e ratang”

Gopola gore ge Modimo a bopa motho, o mmopile a se na sebe. Sebe se tlile ka morago ga go wa ga rakgolo Adamo le koko Efa. Ba be ba dutše ba iketlile Serapeng sa Modimo, ba sa hloke selo. 

‘Tšatši le lengwe ge ba sa iketlile, gwa fihla moeng wo ba bego ba sa mo letela. Ba be ba tlwaetše go etelwa ke Modimo gomme ba iphsina ka dipolelo tša gagwe. 

Ya fihla noga ‘tšatšing leo. Ga ke na bonnete bya gore e ba humane ka fase ga mohlare ba dutše goba bona ba humane yona godimo ga mohlare. Ga ke tsebe; feela go bile le go humanahumanana gona moo. Go se go ye kae, kgang ya tsoga. “A Modimo o tloga a le boditše gore le se ke la ja dienywa tša mohlare ofe le ofe ka mo serapeng?” gwa rialo noga. “Mosadi a e fetola a re: Re ka ja dienywa tša mohlare ofe le ofe ka mo serapeng, ntle le tša mohlare wo o lego gare ga serapa. Modimo o re boditše gore re se ke ra ja dienywa tša mohlare woo goba ra o kgwatha; ge re ka dira bjalo, re tla hwa.” 

Noga ya mo fetola ya re: “Taba yeo ga se therešo; le ka se hwe. Modimo o boletše bjalo ka gobane a tseba gore ge le ka o ja, le tla ba le tlhaologanyo la swana le yena mme la tseba se sebotse le se sebe.” Mosadi a bona gore mohlare woo ke wo mobotsebotse le gore dienywa tša wona e ka ba tše bose ge motho a di ja, gomme a gopodišiša gore e ka ba mo gobose bjang go ja dienywa tšeo le go ba le bohlale. Ka fao a fula tše dingwe tša tšona a di ja. A fa mogatšagwe tše dingwe, mme le yena a di ja.”

Ke eng se se dirilego gore mosadi a fule a je? Le lehono leano le la Satane le sa šoma. Feela Modimo o re leano leo le šoma fela mo go “ba ba nyatšago Modimo” (Baefeso 2:2b) Hlaloso ya Taba e Botse e re; le šoma mo “…baneng ba go se kwe.” Go reng mosadi a jele?

1. Mosadi a bona gore mohlare woo ke wo mobotsebotse 
2. Dienywa tša wona e ka ba tše bose ge motho a di ja
3. E ka ba mo gobose bjang go ja dienywa tšeo le go ba le bohlale

Seragi goba sefu sa sebe se šoma ka dinhla tše tharo; botse, bose, bohlale. Sebe se re aroganya le Modimo ka pono ya mahlo, dikganyogo, le bohlale. Ge bophelo bya motho bo ka laolwa ke kgahlego ya mahlo, dikganyogo, ešita le takatso ya go ba bohlale; go senyega tše di ntšhi.

Eka noga e be e re; “Lena ba babedi kgaale ke le lebeletše. Ke a bona gore le boroko too much! Ga o bone le sa kgone go bona monono wo o lego mo pele ga lena. Le sa le morago bafowethu. Bothata bya lena ke gore ga se la hlalefa. Motho wa bohlale o tseba ditokelo tša gagwe. Feela le se ke la tshwenyego; ke gona. Etlang ke le rute pleke. Nna ke kgale re phela felo mo. Ke mahlwaadibona”

Mekgwa e mentšhi e mebe, re ithutile yona ka ‘baka la gore re be re nyaka go bonagala re hlalefile. Mathomong, matswalo a be a re kgala a re fiša ka gare. Feela ka go nyaka go balwa le ba bohlale, ra gapeletša ra ba ra tlwaela.

Efa a nagana a ba a naganišiša. A gopola se Modimo a se laetšego; a lebelela dienywa, a akanya gore go ka ba byang ge motho a ka ba bohlale? Atšhe!  A fula, a ja. A fa le monna wa gagwe yo a bego a na le yena. Bobedi ba ja dienywa tša mohlare wo Modimo a ba ileditšego ona ba gabile go kwa bose le go hlalefa. Ba ja, ba dula, ba leta gore bohlale bo tle.

Go tloga ka ona motsotso woo batho ba hlanogela Modimo, ba sepela le Satane. Sebe sa bona ya ba go kgaogana le Modimo mme ba šala Satane morago. Ba nyatša keletšo ya Modimo ba šala maaka a Satane morago. 

Erile ba sa itatswa melomo, ba makala ba bona ba sa apara. Ba tšhoga, ba rokaganya matlakala a mogo ba dira diaparo. Sebe se tla go tsamaiša ka lepono mfana. 

Modimo o ba humane moo ba tšhogile e bile ba khutile.  “Gomme Modimo a direla Adamo le mosadi wa gagwe diaparo ka mekgopa ya diphoofolo, a ba apeša tšona” Genesi 3:21. 

Sebe se hlobola batho diaparo. Motho wa sebe o rata go ihlobola a sepele mmele o le kgakala goba a apere di-half; a bontšha le mo go sa swanela go bonwa ke batho. Bophelo bya sebe le byona bo byalo; bo rata go tsamaiša batho ba ihlobotše. Modimo yena o apeša batho. 

Modimo a se sa senya nako, a kgeila ‘jarata tše tharo tša sempabalele a rokela Adamo bokate; a kgeila tše tharo tša motaitšhi a rokela Efa mojikisa; a re haiyee!! A ba koba. Sebe sa ba aroganya le Modimo. 

Le lehono sebe se sa aroganya batho le Modimo. Ba bantšhi e sa le ba tšhaba le lehono ba sa khutile. Ba bangwe ba khutile ka tšhelete, ba bangwe ba khutile ka maemo. Ba bangwe ba khutile ka thuto, bangwe ba khutile ka dikoloi le diaparo tša botse tša fashion. Ba bangwe ba khutile ka morago ga English ya maemo a godimo kudu. Hee!! Ba bangwe ba khutile ka mokgatlo wa dipolotiki. Monna! O ka se kgolwe. Ba bangwe ba khutile ka ngaka mola ba bangwe ba bataletše ka morago ga setšo. 

Lebelela gabotse; wena o khutile ka eng? O gana go ikokobetša pele ga Modimo o tšhiretše ka seriti sa maemo a gago a ko mmerekong.

Ngwanešo tsupuloga ka morago ga seolo seo; Modimo a go apeše.

Kwa memo ya Modimo ge e go obelela. Se diege: Molaetša wo o ngwaletšwe wena. Kwa gore Modimo o reng;

"Lena batho ba (Afrika Borwa)

Sokologang

Nkase sa le galefela

Ka gobane ke na le kgaugelo

Ga ke galefe go ya go ile...

Lena dumelang fela gore le na le molato
Wa go kgeloga go Morena Modimo wa lena
Ipoleleng gore le be le khunamela medimo e šele...

Le gore le be le sa nhlomphe...

Sokologang ke le alafe"

(Jeremia 3:12,13,22)