TŠEA TAOLO YA BOPHELO BYA GAGO Part 1

KATANELA PHOLOŠO YA GAGO

“Barategi, ka ge le be le ntheeletša ka mehla mola ke sa na le lena, gonabyale ge ke le kgole le lena, le swanetše go ntheeletša le go feta. Dulang le katanela phološo ya lena ka tlhompho le poifo” (Bafilipi2:12)

Byale re phološitšwe. Go tloga mo re ya kale? A go fedile? Re ka no tšwela pele ra phela ka mokgwa wo re bego re phela ka ona? Maloba re be re ikgapa re ikgoroša, re le ga mmarobalaoitsoše. Byale re direng?

Eng; ke nnete. Satane o be a re utswitše, a re diriša dilo tša go se tsebalege. Ke yena a re rutilego go dira dibe, a re ruta le go nyatša Modimo, le go nyatša babuši bao Modimo a ba beilego; ka lapeng, setšhabeng, ka kerekeng, dikolong, le mešomong.  

Sa go nyamiša ke gore re be re nagana gore re a ipuša, re na le ditokelo. Kgane ke gona ge re be re šomišwa ke Satane. 

Byale; re ka se kgone go tšwela pele ka mokgwa wo re bego re phela ka ona pele re phološwa. Se lebale gore re be re thupilwe. Satane o be a re dirile makgoba. Bophelo byo re bego re bo phela e be e le bya makgoba feela re sa tsebe. Re be re le makgoba a sebe.

Byale Jesu o re lokolotše. Ga re sa le makgoba a Satane. Jesu o re fa molao o moswa wa go phela. Ge a re lokolla o rile mo go rena; “Etlang go nna bohle ba le lapilego gape le imelwago, gomme ke tla le khutšiša. Phelang ka dithuto tša ka, gomme le ithute ka nna, ka gobane ke yo botho, ke wa pelo ya boikokobetšo, gomme ke tla le khutšiša.” (Mateo 11:28,29)

Kwa se Moya wa Modimo o se bolelago ka moapostola Poulo mo lengwaong la rena le re butšego ka lona. O re; “Dulang le katanela phološo ya lena ka tlhompho le poifo” Go katana ke go šoma ka maatla. Ka mantšu a mangwe; re swanetše go dula re šomela phološo ya rena ka maatla. Yo mongwe a ka re; re šomela phološo ya rena ka maatla byang ka gore Lentšu la Modimo le re; “Go phološwa ga lena ke mpho ya Modimo. …ga se maiteko a lena” (Baefeso 2:8,9) 

Ke nnete; re phološitšwe ka mogau. Re dumetše fela se Modimo a re holofetšago sona gomme Yena a re phološo mahala ka go re gaugela. Feela le ge go le byale, re filwe phološo ka mogau; re swanetse go e hlokomela. Re swanetše go dula re e katanela ka tlhompho le poifo ka gobane yo a bego a re thupile o sa re nyaka. Baisiraele ge ba etšwa Egepeta; kgoši ya Egepeta e ile ya rapa masole a ba kitimiša, a nyaka go ba bušetša mešomong ya bona ya bokgoba. Le go rena go byalo. Satane o a re kitimiša, o nyaka go re bušetša mešomong yela ya bokgoba.

Naa re katanela phološo ya rena byang? Ka go tšea taolo ya maphelo a rena. Ga re sa laolwa ke Satane; re ka fase ga molao wa Moya wa Modimo. Molao wa Moya "o ntokolotše molaong wa sebe le lehu" (Baroma 8:2) Mo go Modimo re filwe maatla a go itaola ka fase ga thato (will) ya Modimo. Maloba Satane o be a re laola ka remote control ya sebe. Jesu Yena ge a re phološa A re tloša ka fase ga sebe a re bea ka fase ga thato (will) ya Modimo.

Lentšu la Modimo le re Satane o a emaema, o nyaka yoo a ka go mo kwametša. Tlhaloso ya Taba e Botse e re; “o a phaphaila” O ya kwa le kwa a galefile. Se lebale gore Satane ke noga. Noga ge e eja legotlo ga e sohle; e a kwametša. Re bona mo Lentšung la Modimo gore le Satane ga a sohle; o a kwametša. Ke ka lebaka leo o kwago Lentšu la Modimo le re; “le phafoge, le ntšhe mahlo dinameng” (1Petro 4:8) Tlhaloso ya KJV e re “be sober”

Ke lona lebakabaka le mophološwa a swanetšego go katanela phološo ya gagwe. Modimo o go file yona mahala, feela ke wena o swanetšego go e hlokomela. Ge o filwe mpho, ga e hlokomelwe ke yoo a go filego yona; e hlokomelwa ke wena. Modimo O re file mpho ya phološo gomme ke rena se swanetšego go e hlokomela. Naa o ka reng ge o ka bona motho yo o mo filego mpho ya seaparo ka letšatši la gagwe la matswalo, a tsena, a re mo go wena; “mogwera ke tlišitše seaparo sela wa go mpha ka letšatši la matswalo a ka. Ke bona se tšhilafetše; byale ke be ke re o se hlatswe ka pelanyana, ke nyaka go se apara?” Re tla tšwela pele ka moso.