TŠEA TAOLO YA BOPHELO BYA GAGO Part 4

TŠEA TAOLO YA MESEPELO YA GAGO

Motho ke sebopiwa sa go phela le batho ba bangwe. (Man is a social being) Motho o a nagana; morago a abelana le batho ba a phelago le bona menagano ya gagwe ka molomo. O šomiša polelo go dira byalo. 

Gape; motho o kgona go sepela. O šimiša maoto go dira byalo. Leoto ke setho sa go laola mosepelo. (Feet are tools of mobility) Le kgona go iša motho mo a nyakago. Motho o thoma ka go nagana, morago a tšea kgato. Naa o gopolo polelo yela ya kgale ye e bego e re; “pelo nkise, maoto mpepe?” 

Lentšu la Modimo le re ruta gore Modimo o na le kgahlego ka mokgwa wo re sepelago ka gona, le mo re emago gona, le mo re dulago gona. “Yo šego ke monna eo a sa sepelego a lailwe ke bakgopo, a se gate tsela ya badiradibe, a se dule tulong tša bakweri.” (Pesalome 1:1) Hlaloso ya Seisimane e e ala ka tsela ye; “Blessed is the man who walks not in the counsel of the ungodly, nor stands in the path of sinners, nor sits in the seat if the scornful.” 

Eka Modimo o re; “O sepela le mang? O eme le mang? O dutše le mang? Mo go Modimo go bohlokwa gore o sepela le mang, o ema le mang gape o dutše le mang. “Le se ke la forwa. Go thwe: Go gwerana le ba babe go senya mekgwa ye mebotse” (1 Bakorinthe 15:33) O ka se tsentšhe leoto ka gare ga leraga gomme leraga leo la se go kgomarele.

Taba ye ke yela re bego re e hlalosa maloba ge re be re re, ka morago ga phološo, motho o hloka badumedi ba bangwe gore a gole le bona. Kgetha batho ba o phelago le bona, o tlo phela.

Ge motho a se no phološwa; o lota mesepelo ya gagwe. Morena Jesu o ruta taba ye ka mokgwa wo; “Ge letsogo goba leoto la gago le go diriša dibe, le ripe o le lahle. Go kaone go ya legodimong o se ne letsogo goba leoto, go na le gore o be le matsogo goba maoto ka mabedi, eupša o lahlelwe ka mollong wo o sa timego.” (Mateo 18:8) Jesu o re segole sa go phela se phala setopo sa maoto goba matsogo a mabedi. 

Mesepelo ka moka ye e go išago dibeng e swanetše go kgaolwa byalo ka leoto goba letsogo. Segwera se se go išago dibeng le sona se swanetše go kgaolwa se lahlelwe mollong wo o sa timego. Segwera se se ngwe e dio ba segwera sa dibe. Bagwera ba gona ba hlakanetše dibe; ba hlakantšhitšwe ke dibe. O kile wa bona segwera se tiišwa ka dibe? Jesu o re KGALA SELO SEO O LAHLELE MOLLONG!

Go na le batho ba bangwe ba ra dibe ba re ke lehlogonolo. Motho wa gona o humana dilo ka go dira dibe pele; morago a buša a re Modimo o mo hlogonolofaditše. Ge ba ikemela bare; you cannot argue with results. Ba re; results justify the means. Ge e le wena ngwanešo, se gwerane le ba mohuta wo. Lentšu la Modimo le re; se sepele le bona, se eme le bona, e bile le go dula o se dule le bona.

Ešita le mošomo wo o sa kgonego go o dira ka ntle le gore o dire dibe, le wona o swanetše go kgaolwa byalo ka setho sa go go šitiša go dira thato ya Modimo. Go na le mešomo e mengwe ya go thekgwa ka dibe. Ge o dumela go dira dibe, o tla šoma - "consider yourself employed." Ge o dumela go dira dibe, gona o tla hlatlošwa (promotion) Ge o gana; gona go padile - o tla ikutlwa. 

Mešomong e mengwe go na le Satane, o apere sutu ya methalo e mesesane; o dutše ka ofising. Ge o mmona o ka re ke motho. O rototše mahlo, o bolela English ke a go botša; accent ke ya moše-wa-mawatle. Mantšu a molomo wa gagwe a boreledi. Motho wa batho; Nooga! Tšhaba! Le go boya o se sa boya. Hlware e tatile kgare godimo ga setulo. TŠHAAABA! Le morago o se sa lebelela. 

Go kaone gore o fetwe ke menate yohle ya dibe go na le gore o lahlegelwe ke bophelo bya gago ka ‘baka la yona. Tšohle tše re sa kgonego go ba le tšona ka ntle le go dira sebe pele, di swanetše go lahlwa. Jesu o re; “Ge letsogo goba leoto la gago le go diriša dibe, le ripe o le lahle. Go kaone go ya legodimong o se ne letsogo goba leoto, go na le gore o be le matsogo goba maoto ka mabedi, eupša o lahlelwe ka mollong wo o sa timego.”

CHINCHA STEPE MZALWANE