TŠEA TAOLO YA MONAGANO WA GAGO Part 2

ITOTE MO GO TŠE O DI NAGANAGO

A re kataneleng phološo ya rena ka go tšea taolo go se re se naganago. Go katana go ra go šoma ka thata - go lwa ka maatla gore o fenye. Re swanetše go šoma ka maatla gore re tšeye taolo ya se re se gopolago mo menaganong ya rena ka gore bophelo bya motho bo laolwa go tšwa monaganong wa gagwe. Re se ke ra fenywa ke megopolo ya rena, re upše re fenye megopolo ye re e naganago. 

Re se ke ra lebala gore monagano wa motho o šoma bošego le mosegare. Le mola mong wa ona a robetše ona ga o eme - ga o robale. Ke ka lebaka leo re se ra swanela go nyefiša mo ntweng ye ya go thopa mogopolo le go o laola. Ge o ka itebala, wa ya le menate, o tla humana monagano wa gago o šetše o tshetše mellwane o ratha sekgwa o lebile kwa! 

Monagano wa motho ga o fetwe ke selo - ke maratahelele. O swana le mpyanyana motho a ile le yona nageng. Ge o ka ya le mpyanyana nageng o tla bona ka moo šedi ya yona e tanywago ke sengwe le sengwe se se iphetelago. Ge e bona mogaditswane e a o kitimiša. E tla re e sa kitimiša mogaditswane ya bona nonyana, le yona ya e kitimiša. Morago ke serurubele. Le monagano wa motho o byalo; o dula o kitimiša dikakanyo. Ga o kgone go dula fela. O dula o theogetše o eya kwa le kwa. O nagana tše di botse le tše mpe - o hlakahlakantšha fela; ke hlakantswiki, ke ledubedube ke a go botša.

Gape, monagano o swana le mollo. Ge o go šomiša gabotse, o na le mohola kudu. Feela ge o go šomiša gampe, o ka dira tshenyo e kgolo kudu. O botse ge o šoma o le ka fase ga taolo ya mong wa wona. Ga botsebotse monagano o swanetše go ba sedirišwa; ga o a swanela go itiriša. 

Byale ge: Motho o swanetše go tšea taolo ya monagano wa gagwe; a se ke a o tlogela o itšhomiša. Go šoma, o kwa re re ga o šome? O šoma kudu. Re gana bošaedi byo. Ge o šoma o le noši, o sena mohlokomedi, ke lešaedi la mafelelo.

Naa motho a ka tšea taolo ya monagano wa gagwe byang? Motho a ka tšea taolo ya monagano wa gagwe ka go laola tše di tsenago ka gare ga monagano wa gagwe. Tše a di kwago, tše a di bonago, tše a di dupago, tše a di latswago le tše a di kgomago di na le khuetšo e kgolo mo menaganong ya gagwe. Ge o ka dumelela tše dibotse di tsena ka monaganong wa gago, o tla nagana tše di botse; ge o ka dumelela tše di mpe di tsena ka monaganong wa gago, le gona o tla nagana tše mpe. Monagano wa motho ga o a swanela go itaolo ka gore ge o itaola, o laola le mong wa wona.

Taba e botse ke gore Lentšu la Modimo ga se la homola ge monagano o dutše o re iša kwa le kwa. Ekwa gore Mangwalo a Makgethwa reng; “Sa bohlokwa go feta tšohle ke go itota mo go tše o di naganago, gobane ke tšona di laolago bophelo bya gago” (Diema 4:23) Taba e Botse. Lentšu la Modimo le re maphelo a rena a laolwa ke tše re di naganago. Ge o ka laola tše di tsenago ka gare ga gago, le tše o di naganago di tla laolwa ke wena. 

Ge motho a dumelela keletšo ya Modimo go hlahla monagano wa gagwe, kgopolo ya gagwe e a mpshafala. Moapostola Poulo ge a hlalwa ke Moya Mokgethwa o laya badumedi o re; “Le se swantšhe mekgwa ya lena le ya batho ba mo lefaseng, le upše le dumelele Modimo gore a le fetoše ka go le mpshafatša dikgopolong” (Baroma 12:1-2) Taba e Botse. Go a hlokega gore tsela ye motho a naganago ka yona e laolwe ke Lentšu la Modimo. Lentšu la Modimo ke sethakga; le diriša motho tše di botse fela. 

Go na le hlaloso enngwe ya Seisimane ba re ke The Message. Yona e hlagiša taba ye ka mokgwa wo; “Don’t become so well-adjusted to your culture that you fit into it without even thinking. Instead, fix your attention on God. You’ll be changed from inside out” (Romans 12:1-2)